Pagatutukan sunod nga impeachment hearing sa House Committee on Justice ang giingong unexplained wealth ug mga isyu sa Statement of Assets, Liabilities, and Net Worth (SALN) ni Vice President Sara Duterte.
Gimando usab ang pagpatawag kang kanhing Senador Antonio Trillanes IV ug pipila ka ahensya sa gobyerno.
Sumala kang House Committee on Justice Chairperson Gerville Luistro, nagpagawas og subpoena ang komite aron obligahon si Trillanes nga motambong sa pagdungog sa Abril 22.
Giila si Trillanes isip kabahin sa Saballa et al impeachment complaint, ilabi na sa isyu sa giingong dili mapasabot nga bahandi sa bise presidente.
Gikompirma usab ni Luistro nga giimbitar ang mga opisyal gikan sa Anti-Money Laundering Council (AMLC).
Gilauman usab ang pagsumite og mga dokumento nga may kalabotan sa bank transactions sa magtiayon nga VP Sara Duterte ug Atty. Manases Carpio.
Lakip sa mga gilauman nga motambong ang mga representante gikan sa Securities and Exchange Commission (SEC), Bureau of Internal Revenue (BIR), ug Office of the Ombudsman.
Ang maong pagdungog magsilbing clarificatory hearing aron klarohon ang mga alegasyon batok sa bise presidente, lakip na ang giingong dili kumpleto nga pagdeklara sa iyang mga kabtangan.
Matud ni Luistro nga gitugyan na niini sa mga miyembro sa komite ang desisyon kung ipatawag pag-usab si Ramil Madriaga sa umaabot nga mga imbestigasyon.