Mokabat sa kapin ₱27,000 nga balor sa mga smuggled nga sigarilyo ang nakumpiska habig nga siyam ka mga indibidwal ang giisyuhan og citation ticket sa gipahigayon nga sunod-sunod nga operasyon sa kapolisan sa walo ka lungsod ug dakbayan sa Bukidnon kaniadtong Setyembre 6.
Subay sa report gikan sa mga otoridad, gipahigayon ang maong operasyon batok sa mga sigarilyo nga walay graphic health warning sticker gikan sa gobyerno. Ang pinakadakong nakumpiska nahitabo sa Talakag diin miabot sa ₱6,400 nga balor sa ilegal nga sigarilyo ang nakuha gikan sa usa ka 55-anyos nga lalaki, gisundan sa Malaybalay City nga nakuhaan usab og ₱5,600 nga balor sa nagkadaiyang brand sa smuggled nga sigarilyo.
Gipahigayon usab ang susamang operasyon sa lungsod sa Quezon diin duha ka babaye ang nadakpan, ingon man sa Kitaotao, Kalilangan, Cabanglasan, Sumilao, ug Maramag. Ang tanang nasikop nga mga tag-iya sa tindahan ug nagbaligya giisyuhan og Citation Ticket subay sa paglapas sa lokal nga ordinansa, habig nga ang mga nakumpiskang kargamento gitugyan na sa matag Municipal ug City Health Office alang sa saktong disposasyon.