Giklaro sa prosecution panel ang ilang posisyon sa giingong corporate interests ni Vice President Sara Duterte ug sa posibleng paglapas sa constitutional ban sa mga opisyal sa gobyerno.
Matud ni Atty. Hezmund Montalan, deputy spokesperson sa prosecution panel, adunay pangutana kung nganong nadeclare sa SALN ni VP Sara ang Gencorp Industries bisan pa nga sa SEC records, giingong retired na kini sa maong negosyo.
Gipasabot niini nga ang isyu may kalabotan sa Article VII, Section 13 sa Konstitusyon nga nagdili sa presidente, bise presidente ug mga miyembro sa gabinete sa pagbaton og negosyo o indirect financial interest sa government contracts.
Matud pa ni Montalan, mas nisamot ang pangutana tungod sa mga government contract nga nalambigit sa Gencorp sa Davao City, diin adunay managlahing ihap ug mga detalye nga makita sa SEC records ug sa gipatik sa social media.
Samtang, bahin sa subpoena kang Davao City Mayor Baste Duterte, giingon ni Montalan nga andam ang prosekusyon nga ipatawag kini isip testigo ug posible usab nga ideklarang hostile witness tungod sa iyang relasyon kang VP Sara ug sa iyang posibleng kahibalo sa isyu sa Gencorp.