Giklaro sa prosecution panel ang ilang posisyon bahin sa giingong corporate interests ni Vice President Sara Duterte ug sa posibleng paglapas sa constitutional ban nga nagdili sa pipila ka opisyal sa gobyerno sa pagbaton og negosyo o indirect financial interest sa government contracts.
Matud ni Atty. Hezmund Montalan, deputy spokesperson sa prosecution panel, may kalabotan ang isyu sa Article VII, Section 13 sa Konstitusyon.
Matud pa ni Montalan, misamot ang mga pangutana tungod sa mga government contract nga nalambigit sa Gencorp sa Davao City. Matud niya, adunay nagkalain-laing ihap ug detalye nga makita sa mga rekord sa Securities and Exchange Commission o SEC ug sa mga gipatik sa social media.
Samtang, bahin sa subpoena kang Davao City Mayor Baste Duterte, giingon ni Montalan nga andam ang prosekusyon nga ipatawag siya isip testigo.
Posible usab, matud ni Montalan, nga ideklarang hostile witness si Baste tungod sa iyang relasyon kang Vice President Sara Duterte ug sa posibleng kahibalo niini bahin sa isyu nga nalambigit sa Gencorp.