Nagpabilin nga usa sa mga dakong hagit alang sa kapulisan sa Rehiyon 10 ang padayon nga pagsulod sa mga kontrabando, partikular na ang mga smuggled nga sigarilyo, sa ilawom sa ilang Area of Responsibility (AOR).
Sumala kay Police Major Joann G. Navarro, tigpamaba sa Police Regional Office 10 (PRO-X), nahimong prayoridad nga ruta sa mga smuggler ang Northern Mindanao tungod sa ka strategic sa lokasyon niini.
Nakita nga ang maong rehiyon ang nagsilbing taytayan nga nagsumpay sa kasadpan (Western), silangan (Eastern), ug habagatang (Southern) nga bahin sa Mindanao, hinungdan nga dali kini nga agianan sa pagpalusot og mga ilegal nga baligya.
Taliwala niini, gipasalig sa kapulisan nga nagpabiling malinawon ug hapsay ang kahimtang sa rehiyon, bisan pa sa padayong pag-atubang sa mga isyu sama sa smuggling, illegal mining, illegal gambling ug mga krimen nga nalambigit sa armas.
Kahinumduman nga mokabat sa P2.3 milyon nga balor sa gitoohang shabu ug kontrabandong sigarilyo ang nasakmit sa mga operatiba sa PRO-10 sa sunod-sunod nga operasyon sa Bukidnon, ug uban pang lalawigan sa Rehiyon.