Patay ang usa ka 89 anyos nga babaye homan miulbo ang dakong sunog kaganinang kadlawon, Pebrero 22, 2026, sa Rizal Extension, Barangay 38-D, Davao City.
Sa inisyal nga report, ang namatay giingong tag-iya sa maong balay nga gigamit usab isip boarding house. Sumala kang Raffy Ampoc, usa sa mga boarders, mikalit lang og ulbo ang kalayo sa maong lugar nga maoy hinungdan sa kalisang sa mga nagpuyo ug wala nay nasalbar sa ilang mga personal nga kagamitan.
Dugang pa niya, gisulayan nilang luwason ang senior citizen, apan tungod kay naka-lock ang gawasan, na-suffocate kini sulod sa balay ug na miresulta sa iyang hinanaling kamatayon.
Nagpadayon pa ang imbestigasyon sa Bureau of Fire Protection aron matino ang hinungdan sa sunog, pila ka kabalayan ang naapektuhan, ug kinatibuk-ang damyos.
Padayon nga atangan ang dugang detalye sa maong insidente.