Subling gipaulanan og bomba sa Russia ang power grid sa Ukraine, nga miresulta sa pagkakalas og dili mumenos sa lima ka kinabuhi ug niangol og 39 ka tawo lakip na ang pagkaguba sa mga pasilidad sa enerhiya.
Tungod sa maong pag-atake, daghang dapit sa nasud ang nawad-an og linya sa kuryente samtang gipaningkamutan sa mga otoridad ang pag-ayo sa mga nangaguba.
Matud sa Ukrainian Air Force, migamit ang Russia og 11 ka Iskander-M ballistic missiles ug 164 ka drones sa sunod-sunod nga atake, diin pipila niini ang nakalusot ug niigo sa mga natural gas facility sa rehiyon sa Poltava ug Kharkiv.
Gikondena ni Presidente Volodymyr Zelenskyy ang maong buhat nga gitawag niining “utter cynicism” sa Moscow, ilabi na nga nahitabo kini dungan sa hisgutanan bahin sa temporaryong ceasefire.
Samtang nagpahibalo ang Russia og unilateral ceasefire alang sa Victory Day, nagpabilin ang tensyon tungod sa pasidaan nga mobalos kon unhan sa Ukraine.
Ang Kyiv usab nagpahayag og kaandam sa ceasefire basta mosunod ang Russia, apan andam silang mopadala og balos sa bisan unsang paglapas niini.
Sa pagkakaron, nagpadayon ang binayloay og atake sa duha ka nasod lakip na ang paglunsad sa Ukraine og long-range strikes sulod sa teritoryo sa Russia.