Mokabat sa P250,000nga kantidad sa marijuana ang gilayong gipang-ibot ug gipangsunog sa hiniusang pwersa sa kapulisan ug militar sa Sitio Salumayag, Barangay Halapitan, San Fernando kagahapong adlawa.
Bisan pa sa malisud nga agianan paingon sa maong dapit, malampusong naabot sa mga operatiba sa San Fernando Police, inabagan sa 2nd Bukidnon Provincial Mobile Force Company, Regional Mobile Force Battalion 10, 1003rd Maneuver Company, ug 89th Infantry Battalion, ang lokasyon sa plantasyon pasado alas 10:00 sa buntag.
Pag-abot sa maong dapit, nadiskubrehan sa mga otoridad ang 800 ka punoan sa marijuana nga gituyo pagtago taliwala sa mga tanom nga kamote ug tabako.
Dihadiha dayon nga gipang-ibot ang maong mga ilegal nga tanom ug gisunog aron masigurong dili na kini makabalik sa merkado.
Gipadayag sa pipila ka mga residente ang ilang kabalaka sa maong panghitabo tungod kay nagpabilin kini nga dakong hagit sa ilang komunidad, ilabi na nga namatikdan ang pagbalik-balik sa pagpananom og marijuana sa maong dapit.Â