Nakadawat og livelihood grant ang pito (7) ka Sustainable Livelihood Program Associations (SLPAs) sa Valencia City atol sa ceremonial check turnover nga gipahigayon kagahapong adlawa, Hunyo 29, 2026, pinaagi sa Sustainable Livelihood Program (SLP) sa Department of Social Welfare and Development (DSWD), uban sa suporta sa City Government of Valencia ubos sa liderato ni Mayor Amie G. Galario ug sa 10th Sangguniang Panlungsod ubos ni Vice Mayor Greizl Galario-Fernandez.
Ang maong grant adunay kinatibuk-ang kantidad nga ₱3,130,000 alang sa Sinayawan Maunlad SLPA, Mabuhay Maunlad SLPA, MBHY 2 LP Farmers SLPA, MBHY 1 LP Farmers SLPA, CPC 1 LP Farmers SLPA, CPC 2 LP Farmers SLPA, ug DKD LP Farmers SLPA.
Miagi sa assessment sa DSWD National Office ug gikwalipikar ang mga benepisyaryo, nga kadaghanan mga miyembro sa Pantawid Pamilyang Pilipino Program (4Ps) ug residente sa Valencia City. Ang unang batch sa maong livelihood assistance alang sa pagpatuman sa egg production, nga gilauman makatabang sa pagpalambo sa panginabuhian ug dugang kita sa mga benepisyaryo.
Lakip sa maong programa ang mga pagbansay alang sa mga benepisyaryo sa financial literacy, enterprise management, ug livelihood operations aron mapalig-on ang ilang kahibalo sa pagdumala sa ilang mga livelihood projects.
Gipatuman usab ang programa pinaagi sa hiniusang suporta sa City Social Welfare and Development Office (CSWDO), City Program Coordinator, ug sa mga nasangpit nga mga barangay.