Hugot nga giatiman karon sa mga doktor ang usa ka 30-anyos nga lalaki human kini brutal nga gipusil sa iyang mismong kauban sa inom didto sa Purok 2, Barangay San Roque, Sumilao, Bukidnon, pasado alas-8:30 sa gabii niadtong Huwebes, Hunyo 18.
Sa inisyal nga pakisusi sa Sumilao Municipal Police Station, nag-ugat ang krimen sa usa ka mainitong lalis tali sa biktima ug sa 43-anyos nga suspek taliwala sa ilang panag-inom. Sa pagtinubagay, gihagit pa matod pa sa suspek ang biktima og duwelo, apan sa dihang wala kini mosukol, mibiya ang suspetsado ug mibalik nga armado na og wala pa matino nga kalibre sa pusil dungan sa pagpusil sa biktima diin taphaw nga naigo ang tuo niining paa.
Bisan og duna’y samad, nakadagan pa ang biktima aron mangayo og tabang sa kasilinganan, hinungdan nga dinalian kining gihatod sa ilang Barangay Captain ngadto sa BPMC Annex sa San Miguel, Manolo Fortich alang sa dinalian nga pagtambal. Sa pikas bahin, nagpabilin gawasnon ang suspek nga paspas nga misibat human sa krimen, samtang gilusad na sa kapulisan ang usa ka flash alarm ug dragnet operation batok kaniya.