Nasikop ang tulo ka mga suspetsado nga nagpayuhot og ilegal nga droga human sila nasapon sa akto sa mga otoridad atol sa gikasang buy-bust operation sa Purok 1B, Kawayanon, Barangay Lumbo, Valencia City niadtong niadtong Mayo 21, 2026 sa gabii.
Nasakmit gikan sa maong operasyon ang unom ka sachet sa gidudahang shabu nga adunay kinatibuk-ang timbang nga kapin sa 6.5 gramo, diin gibana-bana nga nagkantidad og ₱44,200 base sa standard drug price.
Gawas sa maong kontrabando, narekober usab sa kapulisan ang marked money nga gigamit sa transaksiyon, usa ka plastic pouch nga gihimong sudlanan sa ilegal nga droga, ug usa ka Realme nga cellphone.
Sa kasamtangan, anaa na sa kustodiya sa Valencia CPS ang mga dinakpan alang sa saktong disposisyon ug giandam na usab ang ipasakang kaso batok kanila tungod sa paglapas sa Republic Act No. 9165.