Mikabat na sa 28 ka gasolinahan sa Northern Mindanao ang temporaryong nagsira tungod sa kakulang sa suplay, samtang nagpasalig ang Philippine National Police Regional Office 10 (PRO-10) nga walay natalang kaso sa hoarding o ilegal nga pagtipig og suplay sa rehiyon.
Sumala kang PRO-10 Director Brig. Gen. Christopher Abrahano, resulta lamang sa nihit nga suplay sa lana ang pagsira sa pipila ka estasyon ug dili tungod sa tuyo nga pagtago niini aron paabuton ang pagsaka sa presyo. Giklaro usab niya nga hugot ang ilang monitoring sa presyo ug suplay sa lana sa tibuok rehiyon.
Sa datos sa PRO-10, mikabat sa 837 ka gasolinahan ang napaubos sa ilang monitoring diin nakita nga ang probinsya sa Bukidnon ang adunay pinakadaghang nagsira nga miabot sa 19 ka estasyon gikan sa kinatibuk-ang 276 nga anaa sa maong dapit. Lakip usab sa mga nakatala og pagsira ang Misamis Oriental nga adunay upat, sinundan sa Camiguin ug Lanao del Norte nga adunay tag-duha, samtang usa usab ang natala sa Iligan City.
Dugang pa, wala pa’y nadawat nga reklamo kabahin sa overpricing, apan nagpadayon ang ilang pakigdayeg sa Department of Energy (DOE) alang sa inspeksyon sa mga tangke sa gasolinahan aron masiguro ang kamatuoran sa suplay. Giawhag sa PRO-10 ang publiko nga isumbong dayon ang bisan unsang kadudahang kalihokan aron mahatagan og dinaliang aksyon sa mga otoridad.