Gipaspasan sa Department of Energy (DOE) ang pagpatuman sa 22 ka renewable energy projects isip dinalian nga solusyon sa hulga sa krisis sa lana ug aron mapalambo ang alternatibong tinubdan sa kuryente sa nasud.
Sumala ni Usec. Claire Castro sa Presidential Communications Office, ang nag-unang tumong sa gobyerno mao ang pagpakunhod sa pagsalig sa Pilipinas sa imported nga lana, nga sagad maapektuhan sa pag-usab-usab sa presyo sa merkado sa kalibutan.
Gilangkuban ang maong mga proyekto sa 12 ka solar, unom ka hydroelectric, duha ka biomass, usa ka wind project, ug usa ka integrated renewable energy storage system.
Gipasiugda sa kagamhanan nga mahinungdanon kini nga lakang aron mapanalipdan ang ekonomiya ug ang mga konsumidor gikan sa epekto sa krisis sa petrolyo, samtang naningkamot nga makab-ot ang mas lig-on, mas barato, ug mas limpyo nga suplay sa enerhiya alang sa tanan.