Gibantayan og higpit sa kapulisan ang Valentine’s Day concert ni Michael Pangilinan sa Capitol Grounds, Malaybalay City, Bukidnon, diin kapin sa 150 ka personnel ang gi-deploy aron masiguro ang kaluwasan sa mga partisipante ug malikayan ang bisan unsang insidente.
Sa pakighinabi sa Bombo Radyo Malaybalay kay PLTCOL Joepet B. Paglinawan, Chief of Police sa Malaybalay Police Station, ang maong personnel naglakip sa contingents gikan sa 10 ka silingang lungsod ug siyudad. Gipahugtan ang entrance ug exit checkpoints gamit ang overt ug covert security measures, samtang uniformed ug plainclothes officers nag-monitor sa crowd aron masiguro nga hapsay ang pagdagan sa event.
Gipahibalo usab nga walay natala nga krimen o pagpangawat sulod sa maong lugar hangtod sa pagkakaron.
Gipahimangnoan sa kapulisan ang mga bisita nga magmalinawon ug magbantay sa ilang kaugalingong butang. Matud ni PLTCOL Paglinawan, kini nga successful security deployment mahimong template sa umaabot nga Kaamulan ug uban pang dagkong kalihokan sa siyudad.