Patay ang usa ka rider nga kabahin sa BOSS Ironman Mindanao Cup 2026 human malambigit sa usa ka aksidente sa Kibawe, Bukidnon. Giila ang biktima nga si Ronhums Tomuham, 45-anyos, residente sa Nabunturan, Davao de Oro.
Base sa inisyal nga imbestigasyon sa kapulisan, nagmaneho sa iyang motorsiklo ang biktima dihang nabanggaan niini ang usa ka tricycle.
Tungod sa kusog sa pagkabangga, namatay gilayon ang rider.
Wala pa gipagawas sa mga otoridad ang kompletong detalye sa aksidente samtang padayon ang imbestigasyon aron matino ang tinuod nga hinungdan sa maong panghitabo.
Sa pagkakaron, wala pa usab opisyal nga pahayag ang mga organizer sa BOSS Ironman Motorcycle Challenge Mindanao Leg 2026 mahitungod sa insidente. Samtang, gihimangnoan sa mga otoridad ang mga motorista nga mag-amping ug mosunod sa mga patakaran sa kalsada, ilabi na sa mga lugar nga daghan sakyanan.
Kahinumduman usab nga determinadong mopasaka og kaso ang anak sa magtiayong nadasmagan sa usa ka partisipante sa Boss Ironman Challenge 2026 sa Lantapan, Bukidnon, nkagahapong adlawa.
Matud sa anak sa mga biktima, kinahanglang manubag ang rider lakip na ang organizer sa maong lumba tungod sa nahitabong disgrasya.
Ang maong insidente kabahin lamang sa sunod-sunod nga aksidenteng natala sa Bukidnon nga naglambigit sa maong event. Natala usab ang susamang mga aksidente sa Valencia City ug lungsod sa Talakag samtang nagpadayon ang lumba sa probinsya.