Padayon ang tensyon tali sa Iran ug Israel human maglunsad ang Iran og walay hunong nga pagpabuto sa mga ballistic missiles.
Sa nahimong pakighinabi sa Bombo Radyo Malaybalay kang Rosanna Shema, usa ka OFW, minyo ug nga dunay 9-anyos nga anak Bombo International News Correspondent sa Israel, nga napugos matud pa sila sa paghikling padulong sa bomb shelter tungod sa hulga sa mga missile attacks.
Giingon niya nga nakaangkon og trauma ang iyang anak tungod sa sunod-sunod nga pagbuto, ug gihatagan na lamang kini og cellphone aron matabangan nga malingaw ug dili kaayo mabalaka sa kahimtang.
Sukad niadtong Hunyo 13 ug Hunyo 14, dunay gibana-banaang kapin sa 2,000 ka missiles ang gibuhian nga miresulta og dakong kahadlok sa mga OFW nga nanarbaho maong nasod.
Padayon ang koordinasyon tali sa mga OFW ug sa Embahada sa Pilipinas sa Israel diin kanunay ang komunikasyon aron mahatagan og tabang ang anaa sa kritikal nga sitwasyon.
Gisuspendi usab ang mga klase ug trabaho, samtang sirado ang kadaghanan sa mga establisyemento sama sa malls ug gagmayng tindahan.
Limitado usab ang operasyon sa pampublikong transportasyon, lakip ang bus ug tren.
Ang mga ospital lamang ang nagpabiling abli alang sa mga emerhensiya. Dugang pa ni Sheman, dili luwas ang kahimtang sa kadaghanan sa Israel gumikan padayun ang pagpaulan og bomba ang Iran.