Nakatipid og kapin ₱260.4 milyones ang gobyerno sa pag-host sa ASEAN Summit 2026 human gipahulam sa tulo ka pribadong kompanya ang mga sakyanan nga gigamit isip convoy ug service vehicles sa mga lider sa nasud ug mga delegado.
Gipasalamatan ni Palace Press Officer Claire Castro ang maong mga kompanya tungod sa ilang kontribusyon ug gipasalig nga ibalik ang tanang gipahulam nga sakyanan human sa hosting period sa Pilipinas.
Samtang, gipasiugda sa Malacañang ang pagpatuman sa maximum tolerance sa mga kapulisan atol sa mga kilos-protesta nga dungan sa ASEAN Summit, apan gibadlong ang mga demonstrador batok sa pagpahinabo og kagubot ug paglapas sa peace and order.
Sa laing bahin, gipadayon sa mga lider sa ASEAN ang ilang diskusyon sa mga isyu sa rehiyon, lakip ang West Philippine Sea, krisis sa Middle East, climate change, El Niño ug human trafficking.
Gilauman usab sa Malacañang nga mahuman sa dili pa matapos ang tuig ang negosasyon sa Code of Conduct sa South China Sea, diin anaa na sa 77 porsyento ang progreso niini.
Dugang pa, gisagop sa mga lider sa ASEAN ang deklarasyon alang sa patas, etikal ug malungtarong recruitment sa mga migrant worker aron mapalig-on ang proteksyon sa mga overseas Filipino workers, ilabi na batok sa pagpangrekrut kanila ngadto sa mga scam hub.

