Gibasura ni Judge Madonna Echiverri sa Quezon City Regional Trial Court ang ₱1 bilyong civil case nga gipasaka batok nila kanhi House Speaker Martin Romualdez, kanhi Ako Bicol Party-list Rep. Zaldy Co, Rep. Patrick Michael Vargas, mga opisyal sa Department of Public Works and Highways (DPWH), ug pipila ka mga kontraktor.
Ang kaso nga gisang-at ni Antonio Enrile Inton Jr. alang sa United People’s Against Corruption (UPAC) may kalabutan sa giingong anomalya sa mga flood control projects sa Quezon City.
Sumala sa korte, wala madayon ang kaso tungod kay wala mabayri ang gikinahanglang filing fees, busa wala kini makabaton og hurisdiksyon sa maong reklamo.
Sumala sa reklamo nga ang distrito ni Rep. Vargas nakadawat og kapin ₱2.86 bilyon gikan sa 2023 hangtod 2025 alang sa flood control projects sa Northeastern Quezon City, lakip ang Novaliches-Fairview, Commonwealth Avenue, Quirino Highway, ug Regalado Avenue.
Apan bisan pa sa dako nga pondo, nagpadayon gihapon ang pagbaha ug gamay ra ang giingong kausaban sa mga proyekto.
Giklaro sa korte nga ang kaso wala gibasura tungod sa kakulang sa basehan sa reklamo, kondili tungod lamang sa teknikal nga rason nga wala mabayri ang filing fees.