Gipahibalo sa House Committee on Justice nga kinahanglang personal nga muatubang sa komite si kanhi Ako Bicol Partylist Rep. Zaldy Co kung tinuod kining mutestigo sa impeachment complaint batok kang Pangulong Ferdinand Marcos Jr.
Matud pa ni Chairperson Gerville Jovie Luistro, hugot nga gipatuman ang lagda sa impeachment diin ang tanang affidavits, counter-affidavits ug testimonya kinahanglang himuon ug panumpaan sa personal nga presensya sa komite.
Giklaro ni Luistro nga dili itugot ang paghatag og testimonya pinaagi sa online o video conference ug dili usab pwede nga manumpa lamang sa embahada sa Pilipinas sa laing nasud.
Kini nga katin-awan migawas human nibutyag si kanhi Kongresista Mike Defensor, usa sa mga complainant, nga andam si Co nga mutestigo sa alegasyon batok sa Presidente.
Matud ni Defensor, nagpakita og interes si Co nga mutabang sa kaso human gibabagan ang maong impeachment complaint.Bisan pa man niini, giila ni Luistro ang kumplikadong sitwasyon ni Co tungod sa pagka-pugante niini.
Samtang wala pay klarong balaod nga nagdili sa usa ka pugante sa pagtestigo, gipahinumdoman sa kongresista nga si Co adunay warrant of arrest ug dako ang posibilidad nga dakpon kini sa higayon nga mutunob kini pagbalik sa Pilipinas.