Nanawagan si Chinese President Xi Jinping alang sa mas lig-on nga kooperasyon tali sa China ug Estados Unidos human kini giabiabi ni US President Donald Trump sa Washington alang sa usa ka tulo ka adlaw nga opisyal nga pagbisita.
Pinaagi sa pahayag nga gipagawas sa Chinese state media nga Xinhua, gipadayag ni Xi nga kinahanglang magsilbing partners o kaabag ug dili rivals o kaatbang ang duha ka superpower tungod sa nagkahiusa nilang mga interes sa kalibutan. Gidugang usab sa lider sa China nga ang pagpalambo sa iyang nasud ug ang panan-awon nga “Make America Great Again” ni Trump mahimong mag-uban alang sa kalibutanong kalinaw ug kalambuan.
Lakip sa mga pangunang hisgotanan sa ilang bilateral meeting mao ang kalibutanong patigayon, kompetisyon sa teknolohiya ilabi na sa Artificial Intelligence (AI), ug ang diplomatikong relasyon sa China ngadto sa nasud nga Iran.