Nagpadayon ang Estados Unidos sa paglunsad og mga airstrike batok sa Iran sa ika-upat nga sunod-sunod nga adlaw. Gikumpirma sa U.S. Central Command (CENTCOM) nga ilang gipangtarget ang mga pasilidad sa Iran nga giingong gigamit sa pagpangatake sa mga komersiyal nga barko nga nagaagi sa Strait of Hormuz.
Dungan niini, gipatuman usab sa Amerika ang usa ka naval blockade aron mapugngan ang pagsulod ug paggawas sa mga barko sa mga pantalan sa Iran. Sumala sa usa ka taas nga opisyal sa Iran, nakalapas ang maong lakang sa ilang naunang kasabutan alang sa temporaryong hunong-buto.
Giingong naigo sa mga airstrike sa Amerika ang pipila ka dapit duol sa Strait of Hormuz, lakip na ang Qeshm Island, Bushehr, ug mga lugar duol sa utlanan sa Iraq ug Kuwait.
Isip tubag, mibawos usab ang Iran pinaagi sa pag-atake sa mga sakayang pandagat sa Amerika sa Strait of Hormuz nga miresulta sa pagkamatay sa duha ka tripulante. Usa usab ka Norwegian oil tanker ang nadaut human maigo sa usa ka drone attack duol sa nasod sa Oman.