Giduso ni Senator Erwin Tulfo nga klaripikahon dayon sa Impeachment Court kung pila gyud ka boto ang gikinahanglan aron ma-convict si Vice President Sara Duterte sa impeachment trial.
Gipangutana ni Tulfo kung kinsa ang apil sa ihap sa “all members” sa Senado, ilabina kung adunay mga senador nga dili makaapil sa botohan tungod sa lain-laing kahimtang.
Gipasidaan ni Tulfo nga kung literal nga hubaron ang constitutional provision, mahimong maapektuhan ang tumong sa impeachment nga manubag ang mga opisyal sa gobyerno.
Matud niya, kinahanglan nga masulbad kini sa Impeachment Court aron dili mahimong imposible ang proseso sa impeachment tungod lamang sa kakulang sa mga senador nga makaapil sa botohan.
Giingon ni Tulfo nga dili niya tumong nga pasayonon ang conviction, kondili aron masiguro nga balanse ang impeachment process ug ang constitutional demand alang sa accountability.