Kumpiyansa ang House Prosecution Panel nga igo ang ilang mga ebidensya sa impeachment case batok kang Vice President Sara Duterte, bisan pa nga wala pa nila gitawag ang bise presidente isip testigo.
Sumala kang Prosecution Legal Spokesperson Atty. Benjamin Tolosa, nahuman na ang prosecution sa paglatag sa ilang ebidensya ug magsugod na sa pagpresentar sa ebidensya bahin sa Unexplained Wealth.
Matud ni Tolosa, dili pa nila sirad-an ang posibilidad nga tawgon si Duterte isip testigo aron mahatagan siya og higayon nga makahatag og katin-awan sa mga isyu nga ilang gipasaka batok kaniya.
Apan wala pa kini buhata sa prosecution karon tungod kay mahimong mas relevant ang testimonya ni Duterte dili lamang sa isyu sa confidential funds, kondili apil usab sa Unexplained Wealth.
Samtang, giingon ni Tolosa nga lisod na para sa depensa ang pagpukan sa mga ebidensyang ilang gipresentar, bisan pa man nga giila niya nga ang katapusang pagtimbang kung igo ba kini aron makaabot sa conviction anaa sa mga senator-judges.
Gilauman usab ni Tolosa nga mahimong usa sa mga importanteng saksi sa umaabot nga proceedings si kanhi Senador Antonio Trillanes.
Samtang, may suhestiyon usab nga mangayo og ekspertong opinyon bahin sa constitutional threshold aron mas maayong magiyahan ang mga senator-judges sa ilang pagdesisyon.