Sumala ni kanhi kongresista Mike Defensor, ang “surprise witness” nga mitestigo sa Senate Blue Ribbon Committee hearing nga si Sergeant Guteza, kasamtangang anaa sa ilalom sa proteksyon sa Philippine Marines. Wala pa mitubag ang Armed Forces of the Philippines (AFP) ug Philippine Marine Corps sa maong pahayag ni Defensor.
Matod pa niini, si Guteza andam motubag kung siya tawgon sa Senado, Department of Justice (DOJ), o National Bureau of Investigation (NBI). Giklaro ni Defensor nga wala motungha si Guteza sa NBI tungod kay una kini naghisgot nga moapil sa witness protection program apan mas gipili niini nga magpabilin sa proteksyon sa Marines.
Matod pa ni Defensor, pagkahuman sa pagdungog, didto na niadto si Guteza sa kampo sa Philippine Marines ug andam kini motungha sa Senado kung makadawat siya og mando o tawag gikan sa komite. Samtang, nagpadayon ang DOJ sa pagsusi sa reklamo nga posibleng peke ang notarization sa sworn statement ni Guteza, human makaplagan sa korte nga peke ang pirma sa abogado nga giingong nag-notaryo niini.
Gipasabot ni Prosecutor General Richard Anthony Fadullon nga ang maong dokumento dili na binding tungod sa peke nga notarization, apan ang kamatuoran sa gibutyag ni Guteza magpabilin nga gamiton isip ebidensya. Matod pa niini, bisan wala’y notarization, valid gihapon ang testimonya ni Guteza sa Blue Ribbon Committee.