Tingkagol sa prisuhan ang usa ka 26-anyos nga lalaki human kini madakpan sa gipahigayong buy-bust operation didto sa Purok 10, Barangay Barobo, Valencia City, niadtong gabii sa Abril 21. Ang suspek, kinsa giilang usa ka newly identified drug personality, nasikop sa mga otoridad human nakuhaan og ebidensya sa ilegal nga droga alas 9:53 sa gabii.
Atol sa operasyon, narekober gikan sa suspek ang upat ka sachet sa gituohang shabu nga motimbang og 4.2 gramos ug dunay gibanabanang kantidad nga Php28,560. Apil usab sa nakompiska ang Php1,000 nga marked money, usa ka cellphone, ug sudlanan sa droga. Gihimo ang pormal nga inventory sa lugar sa pagdakop sa presensya sa usa ka barangay kagawad ug representante gikan sa media aron masiguro ang katarong sa operasyon.
Gidala na ang suspek sa Valencia City Police Station alang sa saktong dokumentasyon samtang ang mga ebidensya giduso na alang sa forensic examination. Giandam na karon ang kasong paglapas sa Republic Act 9165 kon Comprehensive Dangerous Drugs Act of 2002 nga ipasaka batok sa dinakpan alang sa inquest proceedings.