Gihingusgan sa Sangguniang Panlungsod ang kampanya alang sa kalinaw ug kahan-ayan human mapasar sa ikaduhang pagbasa ang Proposed Ordinance No. 38-2026. Ang maong balaodnon, nga gisugyot ni Councilor Rolando Centillas, nagtumong sa paglimita sa oras sa pagbaligya ug pag-inom og ilimnong makahubog sa mga pampublikong lugar sa dakbayan.
Sumala sa maong ordinansa, gilauman nga mapakunhod ang mga insidente sa kagubot ug aksidente sa dalan nga kasagarang resulta sa sobrang kahubog. Alang sa mga establisimentong makalapas, ang balaod naglatid og bug-at nga mga silot sama sa; Pagpahamtang og multa, Kanselasyon sa business permit ug temporaryong pagsira sa negosyo
Gipaabot nga hingpit nang mapasar ang maong ordinansa sa ikatulo ug pinal nga pagbasa sa mosunod nga sesyon. Sa higayon nga kini mahimong hingpit nga balaod, gilauman nga mas mapalig-on pa ang seguridad ug kaluwasan sa mga lumulupyo sa Valencia City.