Nasikop sa mga otoridad ang usa ka lalaki nga gitudlong suspek sa pagpanglugos sa kaugalingong 10-anyos nga step-daughter kagahapong adlawa, Martes, Abril 7, ning kasamtangang tuig sa Purok 5, Norte, sa lungsod sa Don Carlos, Bukidnon.
Sumala sa taho sa kapulisan, misulay pa og ikyas ang suspek pinaagi sa pagpangayo og tabang sa usa ka residente, diin nagpatu-o kini nga adunay naggukod kaniya aron tugotan nga makatago sa kusina sa maong panimalay.
Apan daling nausab ang dagan sa panghitabo sa dihang nasayran sa tagbalay nga mga pulis ang naggukod sa maong lalaki, hinungdan nga gilayon kining mitaho sa mga otoridad aron itudlo ang gitagoan sa suspek.
Sa dihang girespondehan sa mga pulis ang tawag, ilang nasuta nga ang maong lalaki mao ang gipangita nga suspek sa mangilngig nga krimen batok sa menor-de-edad.
Human malukong sa kusina ug wala na’y dapit nga kapaingnan, wala na makapalag ang suspek sa dihang gipahigayon ang pag-aresto niini sa maong balay.
Bisan pa man sa maong pagkasikop, hugot nga gihimakak sa suspek ang pasangil ug namahayag nga wala niini hilabti ang bata.
Sa pagkakaron, anaa na sa kustudiya sa kapulisan ang suspetsado samtang gihikay na ang tukmang kaso batok kaniya ug nagpadayon pa ang lawom nga imbestigasyon sa maong insidente.