Gipasalig sa Department of Energy (DOE) nga aduna pa’y igong suplay sa lana ang nasud nga molungtad og gibanabanang 45 ka adlaw, samtang padayon ang mga lakang sa kagamhanan sa pagpausbaw sa buffer stock aron malikayan ang bisan unsang kakuwangon.
Sa pikas bahin, gipahayag ni Energy Undersecretary Alessandro Sales nga hugot usab nga ginabantayan ang suplay sa LPG aron maseguro nga dili kini mahutdan sa merkado.
Aron mas mapalig-on pa ang reserba, gibutyag ni Energy Secretary Sharon Garin nga mopalit ang gobyerno, pinaagi sa Philippine National Oil Company (PNOC), og usa ka milyon ka bariles nga diesel nga nagkantidad og P10 bilyones.
Gipahimug-atan usab sa ahensya nga importante ang pagtukod og buffer stock bisan pa man sa limitadong kapasidad, kay aduna kini dako tabang aron maseguro nga dili mahutdan og lana ang nasud taliwala sa nasinati nga krisis sa kalibutan.