Sentro sa atensyon karon sa social media ang kontrobersiya nga naglibot sa bag-ohay lang nga gipahigayon nga Lechon Festival dungan sa selebrasyon sa Kaamulan Festival 2026.
Kini human mibugwak sa iyang kasuko ang bantugang lumad nga Talaandig artist ug lider nga si Waway Linsahay Saway II pinaagi sa iyang Facebook page. Sa iyang post, gihagit ni Saway ang mga organizer sa usa ka panag-istorya aron tul-iron ang giingong mga sayop ug kalapasan nga nahimo batok sa ilang sagradong tradisyon.
Ang maong isyu nagsugod sa dihang gikondenar sa pipila ka mga miyembro sa pito ka tribo sa Bukidnon ang pagpasul-ob og mga beads o kwintas nga simbolo sa ilang kultura ngadto sa mga litson nga baboy. Alang kanila, usa kini ka dakong pagbalastos tungod kay ang Kaamulan usa ka sagradong panagtipon ug dili angay nga saglan og mga kalihukan nga makapakaubos sa ilang kabilin.
Sa pagkakaron, bukas ang Bombo Radyo Malaybalay sa pagdawat sa mga pamahayag gikan sa mga tig-organisa sa maong Lechon Festival ug sa mga opisyal sa probinsya aron mahatagan og katin-awan ang maong isyu ug madungog ang ilang panig.