Nanawagan si Senator Risa Hontiveros sa gobyerno nga dayong aksyunan ang hangyo sa transport sector taliwala sa padayon nga pagsaka sa presyo sa lana.
Sumala sa senador, nagkadaghan ang mga pasahero nga nagsalig sa pampublikong transportasyon, apan nagkagamay ang mga gabiyahe nga public utility vehicles tungod sa kalugi.
Dugang pa ni Hontiveros, nga dili igo ang temporaryong lakang sama sa suspensyon sa excise tax ug kinahanglan og mas konkretong solusyon alang sa sektor.
Bisan pa og adunay ₱5,000 nga transport subsidy, kulangon kini ug kinahanglan pang palapdan.
Gisugyot usab ni Hontiveros ang Senate Bill No. 1986 nga naglatid og ₱52.8 bilyong subsidy package, lakip ang ₱12 bilyon nga direktang tabang sa mga drayber sa PUV, delivery riders, ug TNVS drivers.
Gidugang pa niini ang panginahanglan sa suporta sa transport cooperatives ug pagpalapad sa service contracting program aron masiguro ang padayon nga operasyon.
Nanawagan usab kini sa paspas nga paghatag sa ayuda ug tangtangon ang mga babag sama sa “first owner” rule aron malikayan ang mas grabeng epekto sa transport sector ug sa presyo sa mga palaliton.