Gikumpirma karon sa Department of Labor and Employment (DOLE) Bukidnon nga nakasinati og paghinay ang sektor sa construction sa lalawigan gumikan sa kakuwang sa mga bag-ong proyekto.
Sa pakighinabi sa Bombo Radyo Malaybalay ngadto kang Ruben T. Biado, ang Supervising Labor and Employment Officer sa DOLE-Bukidnon, gibutyag niini nga gawas sa construction, grabeng naigo usab ang agrikultura ug transportasyon. Kini tungod sa walay hunong nga pagsaka sa presyo sa gasolina nga miresulta sa pagkunhod sa kita sa mga mag-uuma, negosyante, ug mga drayber sa probinsya.
Bisan pa man niini, giklaro sa maong buhatan nga wala pa’y opisyal nga report sa mga negosyong hingpit nga nagsira o nag-file og bankruptcy. Hinuon, pipila ka mga kompanya ang nipatuman og flexible working arrangements aron makasugakod sa hagit sa ekonomiya.
Nanawagan karon ang DOLE sa mga tag-iya og negosyo nga makig-alayon kanila aron daling mahatagan og saktong suporta ang mga mamumuo nga apektado sa maong sitwasyon.