Gisiguro ni Agriculture Secretary Francisco Tiu Laurel Jr. nga magpabilin nga lig-on ang suplay sa bugas sa nasud luyo sa pagsaka sa presyo sa lana ug uban pang galastuhan sa agrikultura tungod sa tensyon sa Middle East.
Sumala sa hepe sa DA, ang giingong 20% nga posibleng pagkunhod sa produksyon sa humay giisip lamang nga usa ka “worst-case scenario” ug lagmit dili mahitabo tungod sa mga lakang nga gihimo sa gobyerno.
Dugang pa niini, nakabenepisyo ang Pilipinas sa igong suplay sa bugas sa tibuok kalibutan, ilabi na gikan sa mga nasud sama sa India ug Vietnam nga anaa karon sa panahon sa ting-ani.
Gipahibalo usab sa kalihim nga hapit na mapuno ang mga bodega sa National Food Authority (NFA) nga nagsilbing reserba o buffer stock sa nasud.
Aron matabangan ang sektor, naggahin ang DA og P10 bilyon nga assistance package, lakip ang fuel subsidies, ug andam usab ang gobyerno nga magdugang og P20 bilyon para sa farm inputs ug P10 bilyon para sa mga mangingisda.
Isip alternatibong solusyon, giduso usab sa DA ang paggamit sa biofertilizers aron mamenosan ang pagsalig sa mga mahalong gamit sa pagpanguma.