Giduso sa Senado ang usa ka sugyot balaodnon nga magtugot og price control ang mga produktong petrolyo sama sa diesel ug gasolina panahon sa krisis.
Gipresentar ni Senator Bam Aquino ang maong sugyot nga nagtumong sa pagtubag sa kakulang sa Republic Act No. 7581 o Price Act, diin wala malakip sa price control ang mga nag-unang fuel products bisan dako ang epekto niini sa presyo sa mga palaliton.
Ubos sa sugyot, mahimong ipatuman ang price control sa lana sulod sa 30 ka adlaw kung adunay naglungtad nga krisis diin mas taas kini itandi sa kasamtangang 15 ka adlaw nga naglakip lamang sa LPG ug kerosene.
Gipunting sa senador nga bisan dereguladong industriya ang lana, dili angay pasagdan nga mosaka pag-ayo ang presyo niini, ilabi na kung direktang naapektuhan ang panginabuhi sa publiko.
Gisumite ang maong sugyot tungod sa padayon nga pagsaka sa presyo sa petrolyo nga gumikan sa tensyon sa Middle East, nga nakaapekto usab sa presyo sa ubang batakang palaliton.
Samtang, bisan pa sa deklarasyon ni Pangulong Ferdinand Marcos Jr. sa state of national energy emergency, wala pa kini konkretong lakang nga ipatuman aron i-freeze ang presyo sa lana.