Gibatikos ni Senator Raffy Tulfo karong Martes, Pebrero 3, si Tourism Secretary Christina Frasco tungod sa giingong paghatag og importansya sa iyang kaugalingon imbes nga ang mga tourist destination sa nasud ang i-promote sa mga campaign materials sa Department of Tourism (DOT).
Sa gipahigayon nga hearing sa Senate Committee on Tourism, nagpakita si Tulfo og mga slide sa mga magasin ug uban pang promotional materials diin klaro nga makita ang mga hulagway ni Frasco. “Mura na hinuon mo og nahimong vlogger. Dili mahalin ang atong turismo kung ang inyong nawong ra ang makita sa marketing materials,” matud pa ni Tulfo.
Gihisgutan usab ni Tulfo ang usa ka magasin sa Japan diin giingon niya nga usa kini ka “sayang nga oportunidad” sa pag-promote sa Pilipinas tungod kay mas daghan ang hulagway sa kalihim kaysa sa mga nindot nga dapit sa nasud.
Mitubag usab si Frasco ug miingon nga wala siya naghatag og pagtugot nga gamiton ang iyang hulagway sa maong magasin ug wala usab pondo sa gobyerno ang gigamit sa pagmantala niini. Giklaro usab niya nga wala siyay plano nga modagan sa bisan unsang nasyonal nga posisyon sa umaabot nga piniliay sa 2028, busa wala siya’y rason nga mag-promote sa iyang kaugalingon.
Hinuon, gitubag kini ni Tulfo pinaagi sa pag-ingon nga wala siya nagpasangil nga modagan ang kalihim, apan nabantayan lang gyud sa mga tawo ang maong “self-promotion” bisan unsa pa ang rason niini.