Gikuwestiyon pag-usab sa Senado ang sunod-sunod ug paspas nga pagsaka sa presyo sa produktong petrolyo sa nasud nga dako og epekto sa panginabuhi sa mga Pilipino.
Atol sa gipahigayong hearing sa Committee on Energy, gikuwesyon ni Senador Rodante Marcoleta ang Department of Energy (DOE) kon duna ba’y konkreto nga lakang ang gobyerno aron mapugngan o maibsan ang maong krisis.
Matud pa sa senador, kinahanglan ang mas paspas nga aksyon tungod kay ang mga tsuper ug ang ordinaryong mga konsumidor ang labing nag-antos sa kamahal sa lana.
Samtang ang DOE, gipasabot ni Secretary Sharon Garin nga ang maong pagsaka gumikan sa padayun nga tensyon sa Middle East ug sa nagkakunhod nga supply sa merkado sa tibuok kalibutan.
Bisan pa niini, gipasalig sa ahensya nga duna sila’y mga ‘contingency plan’ aron maseguro nga dili makasinati og kakulang sa supply sa lana ang Pilipinas.
Padayon ang panawagan sa mga magbabalaod nga mangita og paagi aron dili na mosaka pa ang presyo sa lana sa umaabot nga mga semana.