Duha ka lalaki, lakip ang giila sa kapulisan nga regional drug target, ang nadakpan sa gipahigayong buy-bust operation sa City Drug Enforcement Unit-Malaybalay pasado alas 3:31 sa hapon, Nobyembre 8, sa Purok 3, Barangay Sinanglanan, Malaybalay City, Bukidnon.
Giila ang mga dinakpan sa alyas Reland, 47 anyos, usa ka mag-uuma, ug alyas Eric, 34 anyos, nga panday ug pulos residente sa maong lugar.
Nakuha gikan kang Reland ang upat ka pakete sa gituohang shabu nga gibana-banaang motimbang og 10 gramos ug nagkantidad og P68,000, lakip ang usa ka pitaka, hinimo nga pusil nga shotgun, magasin, upat ka bala ug buy-bust money.
Base sa inisyal nga impormasyon, gituohang nag-apod-apod og ilegal nga droga ang maong drug target sa Barangay Bangcud sa Malaybalay City, ingon man sa mga barangay sa Colonia ug San Isidro sa Valencia City.
Sa pagkakaron, anaa na sa kustodiya sa Malaybalay City Police Station ang duha ka dinakpan ug mag-atubang og kasong paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act.