Nasentensyahan og 60 ka tuig nga pagkabilanggo sa Pilipinas ang usa ka South Korean national nga giingong nagplano og talagsaong pamaagi sa pag-ikyas gamit ang drone.
Giila ang suspek nga si Park Wang-yeol, 47 anyos, nga giingong naghimo og detalyadong plano uban sa iyang mga kauban.
Matud sa South Korean media, naghimo matud pa sila og pipila ka test flight gamit ang drone nga adunay kapasidad nga makadala og hangtod 75 ka kilo.
Nadiskubre matud pa sa mga awtoridad ang maong plano human makuha ang video sa usa sa ilang mga test flight.
Base sa report, mikabat sa 100 milyong won o kapin P4.6 milyon ang ilang gigasto sa pag-andam sa operasyon, lakip na ang pagpalit sa drone nga gamiton unta sa pag-ikyas.
Ubos sa maong plano, palupadun unta si Park gawas sa prisohan gamit ang drone human kini ikabit sa iyang lawas.
Gitun-an usab umano nila ang posibilidad sa pag-atake sa sakyanan nga magdala kaniya gikan sa prisohan.
Nasentensyahan si Park niadtong 2022 og 60 ka tuig nga pagkabilanggo tungod sa pagpatay sa tulo ka South Korean nationals nga nakit-ang patay sa usa ka tuboan duol sa Bacolod City niadtong 2016.
Una na usab umano siyang nakaikyas gikan sa kustodiya niadtong 2017 ug 2019 samtang gibalhin alang sa mga hearing sa korte.
Niadtong Marso, temporaryong gibalik si Park sa South Korea aron atubangon ang kaso nga may kalabotan sa giingong pagpasulod og 4.8 kilos nga methamphetamine sa maong nasud.
Gi-report usab nga aduna matud pa siyay access sa air-conditioned nga selda, telebisyon ug cellphone samtang nakadetine sa New Bilibid Prison.