Gibutyag ni kanhing senador nga si Antonio Trillanes IV nga posible nga si Senador Bong Go na ang sunod nga maisyuhan og warrant of arrest gikan sa International Criminal Court sunod kang Senador Ronald “Bato” dela Rosa.
Matod ni Trillanes, nakadawat matud pa kini og impormasyon nga adunay giandam nga warrant batok kang Go kalabot sa kasong crimes against humanity, murder, ug attempted murder.
Dugang pa ni Trillanes, posible pang moabot og pila ka bulan una mugawas ang maong warrant depende sa proseso ug imbestigasyon sa ICC.
Gipunting usab ni Trillanes nga si Go giingong nalambigit sa mga alegadong extrajudicial killings atol sa administrasyon ni kanhing Pangulo nga si Rodrigo Duterte.
Sumala pa sa kanhing senador, gireklamo si Go sa ICC tungod sa alegasyon nga sa panahon sa kampanya kontra droga, siya matud pa ang naghatag og reward sa matag assassination isip giingong lider sa special operation group sa gitawag nga “National Death Squad” ni Duterte.
Gawas kang Go, matod ni Trillanes nga posible usab maapil sa mahimong warrant gikan sa ICC si kanhing hepe sa Philippine National Police nga si Oscar Albayalde.
Sa pagkakaron, bukas ang pultahan sa media alang sa pahayag nila Go ug Albayalde kabahin sa mga alegasyon nga gipadayag ni Trillanes.
Samtang, emosyonal si Senador Ronald “Bato” Dela Rosa samtang nagpahayag sa iyang kabalaka alang kang Senador Christopher “Bong” Go tungod sa posibleng pagdakop niini sa International Criminal Court.
Matod ni Dela Rosa, buotan ang maong senador ug lisod alang kaniya nga makita nga maapil sa kontrobersiya ang iyang kaalyado ug suod nga higala.
Nahitabo ang maong pamahayag taliwala sa nagpadayong imbestigasyon sa ICC kalabot sa kampanya kontra ilegal nga droga sa administrasyon ni kanhing Pangulo nga si Rodrigo Duterte.
Lakip si Go ug uban pang personalidad sa miaging administrasyon sa listahan sa mga giila nga posibleng “perpetrators” o nalambigit sa operasyon batok sa ilegal nga droga nga giimbestigahan karon sa ICC.