Nagbahad ang Motorela Federation sa Malaybalay City nga magpahigayon og welga kon magpadayon pa ang pagsaka sa presyo sa petrolyo, taliwala sa nagkagrabe nga kalisod sa panginabuhian sa mga drayber sa dakbayan.
Gipadayag ni Marlon A. Igpit, presidente sa maong pederasyon, nga tungod sa mingaw nga pamasada ug taas nga presyo sa gasolina, anaa na lamang sa gibanabanaang ₱250 ang mabilin nga kita sa usa ka drayber alang sa ilang mga pamilya human sa walo ka oras nga pagbiyahe.
Apektado usab sa maong krisis ang 780 ka motorela drivers ug kapin 1,000 ka operator-drivers ug alternate drivers, diin kadaghanan kanila nag-agwanta sa inadlaw nga obligasyon ug abang sa ilang gipamasadang unit, lakip na ang gamay nga kitang mahabilin alang sa panginahanglanon sa panimalay.
Tungod niini, nanawagan ang pederasyon sa national government nga suspindihon ang excise tax sa petrolyo aron deretsong moubos ang presyo sa gasolina.