Gipahugtan sa Police Regional Office-10 (PRO-10) ang seguridad sa mga tunghaan sa tibuok Northern Mindanao pinaagi sa hugot nga police visibility, foot patrols, ug cyber patrolling taliwala sa mga nagpadayong hulga sa internet batok sa mga eskwelahan. Sa pakighinabi sa Bombo Radyo Malaybalay kay PRO-10 Spokesperson PMaj. Joann Navarro, gipahayag niini nga nagpadayon ang maong direktiba sa tibuok rehiyon diin nakig-alayon sila sa Anti-Cybercrime Unit-10 aron masubay ang mga naggikan nga hulga sa social media.
Nagpahigayon usab ang kapolisan og mga active-shooting exercises, symposiums, ug intelligence monitoring kauban ang mga opisyal sa eskwelahan ug lokal nga kagamhanan.
Samtang sa bahin sa Bukidnon National High School (BNHS), gipahayag ni Principal IV Paul O. Orong nga gipahugtan usab nila ang ilang security protocols. Lakip na niini ang paggamit og metal detector, bag inspection sa mga magtutudlo ug bisita, police visibility sa mga tunghaan, ug ang gipang-andam nga surprise inspection sa mga classroom kauban ang School Governing Council ug PTA.
Gidugang ni Orong nga mimenos na ang nakumpiskang mga gidiling butang gikan sa mga estudyante sukad gipatuman ang mas hugot nga seguridad ug wala pa usab sila’y namatikdan nga seryosong insidente sulod sa BNHS campus.