CAGAYAN DE ORO CITY — Wala pa’y nadawat nga opisyal nga direktiba ang Police Regional Office-10 (PRO-10) bahin sa posibleng reshuffling o pagbalhin sa mga Provincial ug City Directors sa rehiyon human sa paglingkod ni Police Brigadier General Aaron Mandia isip bag-ong Officer-in-Charge (OIC).
Gipahayag ni PRO-10 Spokesperson PMaj. Joann Navarro nga pormal ug normal nga proseso sa Philippine National Police (PNP) ang lahugay sa mga opisyal, ilabi na kon adunay mga retirement o bag-ong designation sa mga senior police officers. Gidugang ni Navarro nga ang pagpili sa mga itudlo nga hepe nagdepende gihapon sa trust and confidence sa mga commanders ug sa taas nga pamunoan.
Sa kasamtangan, magpadayon si PBGEN Mandia sa iyang katungdanan sa rehiyon isip Deputy Regional Director for Administration (DRDA) samtang gidugang ang pagdumala sa PRO-10, human gitudlo si PBGEN Christopher Abrahano isip OIC sa National Capital Region Police Office (NCRPO).