Gipahugtan pa sa Bukidnon Police Provincial Office (BUKPPO) ang seguridad alang sa nagpadayon nga Kaamulan Festival 2026 human mitala og zero incident ang selebrasyon sukad sa pag-abli niini. Sa pakighinabi sa Bombo Radyo Malaybalay ngadto kang PCpt. Sheila Joy P. Jangad, ang tigpamaba sa Bukidnon Police Provincial Office (BukPPO), iyang gibutyag nga bisan wala’y naitalang bisan unsang untoward incident hangtod karon, nagpabilin sa full alert status ang kapulisan.
Kini aron masiguro ang kaluwasan sa libo-an ka mga katawhan nga nagtapok sa Capitol Grounds ug uban pang venues sa panagtapok, ilabi na nga nagkaduol na ang mga dagkong kalihokan sama sa SMB Nights ug ang gipaabot nga street dancing competition.
Naka-full force duty usab ang kapulisan aron mapalig-on ang police visibility ug mapugngan ang bisan unsang hulga sa seguridad dungan sa pagdagsa sa mas daghang mga bisita ug turista sa dakbayan sa Malaybalay.
Dugang pa sa opisyal, duna’y nadawat nga augmentation o dugang pwersa gikan sa Police Regional Office (PRO)-10 nga nagpabilin sa Bukidnon aron mohatag og suporta sa seguridad sa Kaamulan. Bisan pa man sa maong dakong deployment, gipaniguro sa kapulisan nga nagpadayon gihapon ang mga peace and order operations sa tanang lungsod ug siyudad sa tibuok lalawigan.