Nadiskubrehang wala na’y kinabuhi ang usa ka 55-anyos nga security guard sulod mismo sa iyang gitrabahoan sa lungsod sa Maramag, pasado alas-4:30 sa hapon niadtong Biyernes, Hunyo 19.
Base sa inisyal nga imbestigasyon sa Maramag Municipal Police Station, nakit-an na lamang sa iyang kauban ang biktima nga nagkulob sa salog samtang nagsul-ob pa sa iyang uniporme. Nasayran nga hapsay pa kining misulod sa iyang duty alas-5:30 sa buntag sa maong adlaw sa wala pa nahitabo ang insidente.
Gisalikway sa mga otoridad ang posibleng foul play o krimen tungod kay wala’y nakitang bisan unsang timailhan sa samad o bun-og sa lawas sa biktima. Gikumpirma usab sa asawa niini nga dugay nang nag-antos sa sakit sa kasingkasing ang iyang bana ug naospital pa kini niadtong miaging bulan sa Mayo. Sa pagkakaron, gidala ang patay’ng lawas sa Bukidnon Provincial Hospital sa Maramag alang sa dugang pagsusi aron opisyal nga matino ang hinungdan sa kamatayon niini.