Gipanghimakak ni United States Vice President JD Vance ang mga nanggawas nga taho nga gipasira na usab sa nasod sa Iran ang estratehiko ug kritikal nga agianan sa barko nga Strait of Hormuz.
Sa usa ka interview, gipahayag ni Vance nga wala sila’y nakitang bisan unsang ebidensya o timailhan nga gisirad-an ang maong katubigan. Gitino pa niya nga duna’y gibanabanang 16 ka milyon ka baril sa lana sa Amerika ang luwas nga nakalabay sa maong dapit ug padayon gihapon ang normal nga pagbiyahe sa mga commercial nga barko didto.
Kini nga katin-awan sa Amerika miguwas human una nga gipahibalo sa Revolutionary Guard sa Iran nga ilahang gipasira ang Strait of Hormuz tungod sa giingong paglapas sa US ug Israel sa kasabutang ceasefire, dungan usab sa nahitabong sunod-sunod nga airstrike sa Israel didto sa Lebanon.