Sikop sa mga otoridad ang usa ka 33-anyos nga lalaki human nakuhaan og kapin ₱35,000 nga kantidad sa gituohang shabu didto sa United Village, Barangay Poblacion, ning lungsod, pasado alas-12:06 sa kaadlawon niadtong Hunyo 20.
Giila ang suspetsado sa alyas nga “Ricric,” kinsa nasansan sa hiniusang operasyon sa Pangantucan Municipal Police Station, Bukidnon 2nd PMFC, ug Provincial Intelligence Unit. Nasakmit gikan sa iyang posisyon ang tulo ka sachet sa iligal nga droga nga may gibug-atong 5.18 gramos ug gibanabanang nagkantidad og ₱35,224, uban ang ₱500 nga buy-bust money.
Gihimo ang imbentaryo sa mga pinakete sa shabu atubangan sa mga opisyal sa barangay ug mga representante sa media. Sa pagkakaron, gikasal na batok sa suspek ang kasong paglapas sa Republic Act 9165, samtang ang mga ebidensya gidala na sa Bukidnon Provincial Forensic Unit alang sa laboratory examination.