Padayon ang search and rescue operation sa Mt. Kalatungan aron pangitaon ang missing mountain climber nga 31-anyos nga si Alkharj Gomez Zamayla, kinsa nadiskubrihang walay bitbit nga opisyal nga permit sa iyang pagsaka.
Sumala ni Bukidnon PDRRMC Head Israel Johan Damasco Jr., pito ka rescue teams ang gipakatap sa nagkalain-laing bahin sa bukid aron sa paspas nga pagpangita.
Gibutyag usab ni Damasco nga nagbutang na sila og internet connection sa lugar aron mapalambo ang komunikasyon ug koordinasyon sa mga rescuers.
Gigamit usab sa operasyon ang duha ka K9 dogs ug drone technology aron mas dali ma-locate ang missing climber.
Nagpadayon ang koordinadong pagpangita samtang naglaom ang pamilya ug mga awtoridad nga makit-an dayon si Zamayla nga luwas kini.