Miabot na sa kinatibuk-ang 1,184 ang ihap sa mga Persons Deprived of Liberty (PDL) sulod sa Bukidnon Provincial Detention and Rehabilitation Center (PDRC), diin kapin sa 54% niini ang nag-atubang og mga kaso kalambigit sa ilegal nga droga.
Sa pakighinabi sa Bombo Radyo Malaybalay ngadto kang Provincial Warden Nelson A. Balaba, gipahayag niini nga gawas sa drug-related cases, duna usa’y nabilanggo gumikan sa krimen sa pagpanglugos, pagpatay, ug pagpangawat.
Gitino ni Balaba nga aron malikayan ang paghuot, duna sila’y gilusad nga regular nga pagbalhin sa mga convicted PDL nga duna’y sentensya nga tulo ka tuig paubos ngadto na sa Davao Penal Colony (DAPECOL). Â
Luyo niini, gipasigarbo sa opisyal nga ang PDRC nagsisilbi nga tinuod nga pasilidad sa rehabilitasyon pinaagi sa paghatag og libreng edukasyon ubos sa Alternative Learning System (ALS) gikan elementarya hangtod Senior High School, dungan sa vocational trainings kauban ang TESDA sama sa carpentry ug motorcycle repair.
Karong umaabot nga Hunyo 30, gilauman nga kapin sa 30 ka mga priso ang mogradwar sa maong programa sa tunghaan isip pagpangandam sa ilang pagbalik sa komunidad.