Naghimo na usab og bag-ong kasaysayan ang sikat nga P-pop group nga SB19 human napili isip kauna-unahang Pinoy group nga mopahigayon og ceremonial first pitch sa usa ka Major League Baseball (MLB) game didto sa Estados Unidos.
Gitakdang molabay sa bola ang lima ka miyembro nga sila si Pablo, Stell, Ken, Josh, ug Justin sa dula tali sa Chicago White Sox ug New York Yankees karong Hulyo 29 didto sa Guaranteed Rate Field sa Chicago.
Ang maong dungog bahin sa ilang gipahigayon nga international tour, diin gitakda usab silang magtanghal sa prestihiyosong Grammy Museum ug sa Lollapalooza music festival.
Tungod niini, nalakip ang SB19 sa pipila lamang ka bantogang Pilipino nga nakahimo na ug first pitch sa MLB katulad nila ni boxing icon Manny Pacquiao, aktres Liza Soberano, ug comedian Jo Koy.