Mabug-at ang nahimong testimonya ni Gina Acosta, kanhi Special Disbursing Officer sa Office of the Vice President, human iyang gikumpirma nga si Vice President Sara Duterte mismo umano ang naghatag og instruksyon nga i-release kang Colonel Raymund Dante Lachica ang ₱125 milyon nga confidential funds human kini ma-encash sa LandBank.
Matud ni House Prosecutor Representative Terry Ridon, dako kaayo ang kantidad sa ₱125 milyon ug hangtod karon wala pa klaro kung asa napunta ang maong kwarta ug kinsa ang mga nakadawat niini.
Sa press conference sa prosecution, gipakita ni Ridon ang representasyon sa ₱125 milyon aron makita sa publiko ang kadako sa kantidad nga nalambigit sa maong isyu.
Samtang, nanawagan si Manila Representative Bienvenido Abante nga tapuson na ang impeachment proceedings batok kang Vice President Sara Duterte tungod sa dako ngA gasto sa gobyerno.
Matud ni Abante, anaa na sa Senate Impeachment Court ug mga Senator-Judges ang pagdesisyon base sa mga ebidensyang gipresentar sa prosecution.
Sigon usab niya nga daghan pa og importanteng isyu nga kinahanglan tutukan sa Kongreso, lakip ang flood control projects, national budget ug uban pang mga balaod.
Giinsistir ni Abante nga kinahanglan nang adunay closure sa impeachment case aron malikayan ang dugang nga paggasto sa kwarta sa katawhan.