Kritikal sa balay tambalanan ug gipaubos sa dinalian nga operasyon ang usa ka 28-anyos nga lalaki human gidunggab sa tiyan sa usa ka alyas “En-En” atol sa usa ka panag-inom sa Purok 4b, Barangay Poblacion, Valencia City niadtong Sabado sa gabii, Agosto 15, 2026.
Subay sa imbestigasyon sa Valencia City Police Station, nitambong ang biktima ug ang suspek sa gipahigayon nga pagsaulog sa adlawng natawhan sa amahan sa live-in partner sa biktima. Taliwala sa maong panag-inom, nagkainitay sa lalis ang biktima ug ang iyang live-in partner, diin mipatunga ang suspek nga miresulta sa ilang sumbagay. Sa tunga-tunga sa ilang pag-away, miikyas ang suspek human niini gidunggab sa tiyan ang biktima gamit ang gitagong kutsilyo.
Gidali sa pagdala ang biktima sa Bukidnon Provincial Medical Center sa Lungsod sa Malaybalay kung asa kini gi-operahan. Sa kasamtangan, nagpadayon ang hot pursuit operation sa kapulisan sa Valencia City aron matino ang tinuod nga pagkatawo sa suspek ug mapasaka ang haom nga kaso batok kaniya.